Nā Haʻawina 345

‘O ka haʻawina hope loa kēia o ke kau nei! Hulō! Eia ihola:

E loaʻa nō nā moʻolelo nūpepa he ʻehā (a ʻoi paha) i pili i kāu kumumanaʻo hoʻokahi i noʻi ai. Heluhelu ʻia, a kālailai ʻia nā manaʻo i loaʻa i loko o laila. Lilo ia mau kālailai ʻana i pepa, no ka wehewehe ʻana i ke ʻano i kākau ʻia ai kēia kumumanaʻo i loko o nā nūpepa o ka wā ma mua. E hoʻokomo nō i nā laʻana a me nā puanaʻī mai loko mai o nā moʻolelo nūpepa, e helu papa aku ma kekahi Papa Kūmole, a e pākuʻi nō i nā moʻolelo ma kāu pepa.

No ke kaila o ka pepa, e nānā i kēia palapala. Waiho ʻia ka pepa ma kāu faila haumāna ma mua o ka hola 4 o kēia Pōʻalima, lā 20 o Kēkēmapa.

Mahalo iā ʻoukou a pau loa no kēia kau piha i ke aʻo a me ke aloha. E hoʻonanea i kēia wā hoʻomaha!!

Na Kamaile ka moʻolelo hope loa a kākou e nānā pū ai. E makaʻala i ka ʻaoʻao Wehewehe MNP, a loaʻa aku auaneʻi.

Eia hoʻi, ma kēia mau pule ʻelua e pau pono ai kāu moʻolelo KUH #3, a e hoʻomākaukau pono no ka pepa noiʻi nūpepa.

E pau ke kā mua o kāu moʻolelo ʻekolu no Ka Ulu Hoi!

Na Nohealani ka Wehewehe MNP o kēia pōʻakahi aʻe. E makaʻala a loaʻa mai kāna moʻolelo ma ka ʻaoʻao kūpono o nei paena pūnaewele.

Eia kekahi, e hana nō a paʻa ke kā mua piha o kāu moʻolelo KUH 3 ma ka pōʻakolu, lā 27 o Nowemapa. E noke i ka hoe!!

E pau hoʻi kāu paukū hōʻuluʻulu moʻolelo ma mua o ka papa i ka p3. Waiho ʻia hoʻi ma loko o kēia faila, i hiki iā kākou a pau ke heluhelu a kōkua aku.

Eia kekahi, na Kainalu e wehewehe i kekahi moʻolelo nūpepa. E makaʻala i ka ʻaoʻao Wehewehe MNP o nei paena pūnaewele. I laila nō e kiʻi ai, ke loaʻa mai iaʻu ka palapala.

Na Nālani ka wehewehe ʻana i kēia moʻolelo. E kiʻi aku nō ma ka ʻaoʻao Wehewehe MNP o nei paena pūnaewele.

Eia kekahi, ʻo ka pōʻakahi ka lā e paʻa ai ke kumumanaʻo o ka moʻolelo 3 o Ka Ulu Hoi, paʻa pū kahi paukū hoʻokahi nāna e hōʻuluʻulu a hoʻākāka. Ma kēia faila nō e waiho aku ai.

I kēia pule, e hoʻokō pono aku i nā haʻawina i koe paha iā ʻoe: ka moʻolelo KUH #2, ka Pepa Ana Holomua, a me kāu Pepa Noiʻi Pōkole #2. I kēia pule aʻe, e hoʻomaka nō kākou i ke kākau ʻana i ka moʻolelo hope loa no Ka Ulu Hoi.

Na Nāpua e wehewehe mai i kēia moʻolelo nūpepa; aia nō ke waiho lā ma ka ʻaoʻao Wehewehe MNP o nei paena pūnaewele. Eia kekahi, e hoʻopau i ke kā hou/hope o ka moʻolelo no Ka Ulu Hoi, a e kākau inoa ma ʻaneʻi no ka hālāwai pū ʻana me ke kumu.

Na Momi e wehewehe i moʻolelo nūpepa. E makaʻala i ka ʻaoʻao Wehewehe MNP o nei paena pūnaewele i loaʻa ka moʻolelo.

‘O kēia hoʻi ka pule e pau ai ka moʻolelo ʻelua no Ka Ulu Hoi. E hoʻoikaika a hoʻoponopono ma mua o ka hopena o ka pule.

Na Kūlani kēia moʻolelo e hoʻākāka mai. Ō kiʻi aku ma ka ʻaoʻao kūpono o nei paena pūnaewele.

Eia kekahi, e pau nō ka Pepa Pōkole #2 (no ka papahana noiʻi nūpepa kēia) i kēia pule; ʻo ka lā 1 o Nowemapa ka palena pau. Ke mākaukau waiho ʻia i kāu faila haumāna, ma loko hoʻi o ka faila "Noiʻi Nūpepa."

Eia nō ia lā:

10/28: Na ʻĀnela ka wehewehe MNP, aia nō ke waiho lā i ia ʻaoʻao o nei paena pūnaewele.

10/28-11/1: E kākau i ka Pepa Pōkole #2 (no kāu papahana noiʻi nūpepa), a waiho akula i ia faila ma Google.

11/6: kā hope KUH #2

11/4-15: Pepa Ana Holomua me ka hālāwai ʻana me ke kumu. E loaʻa auaneʻi he pepa kākau inoa.

‘Oia. Ola kākou!

He moʻolelo nūpepa kēia a Kalawaiʻa e wehewehe mai ana. E eʻe aku nō ma ka ʻaoʻao Wehewehe MNP a loaʻa mai ua palapala nei.

Na Kamalupāwehi e wehewehe i kekahi moʻolelo. E makaʻala a loaʻa ma ka ʻaoʻao Wehewehe MNP o nēia paena pūnaewele.

Eia hoʻi, e kākau i kāu pepa pōkole mua no ka papahana noiʻi. Waiho ʻia akula i loko o ka faila Papahana Noiʻi ma kāu faila haumāna ponoʻī, ma mua o ka papa i ka pōʻakahi.

E wehewehe ʻia ana kēia moʻolelo nūpepa e Maikalewa. E heluhelu aku nō ma mua o ka hui ʻana i ka pōʻakolu.

Eia kekahi haʻawina no ka hoʻoulu ʻana i kāu moʻolelo KUH2: e ʻimi aku i mau lālani mele i pili aku i kekahi manaʻo i kākau ʻia i loko o ia moʻolelo, a e hoʻokomo aku nō i loko o ka moʻolelo. ʻO ia kekahi mea a kākou e nānā pū ai i ka pōʻakolu.

Na Lele kahi mele e wehewehe ai no ka nūpepa Kuokoa. Ma ka ʻaoʻao Wehewehe MNP e loaʻa ai.

Eia kekahi, e hoʻopaʻa koke i ke kumumanaʻo o kāu Noiʻi Nūpepa, kiʻi ʻia nā moʻolelo ʻehā e kālailai ai, a e kākau i ka Pepa Pōkole no ka moʻolelo mua loa. ʻO kēia pepa, he hōʻuluʻulu i ka moʻolelo nūpepa, me ka hoʻākāka ʻana hoʻi i kona pilina i kāu papahana a me ke ʻano o kāu kālailai ʻana. Pau ia ma mua o ka lā 21 o ʻOkakopa, a waiho ʻia i kāu faila Noiʻi Nūpepa.

‘O kahi hana koe iā kākou, ʻo ia ka hoʻopuka ʻana i ka pukana mua o Ka Ulu Hoi. E nānā hou ka maka i kāu moʻolelo mua i haku ai; inā he wahi nīnau i koe, e hoʻopihapiha aku nō.

‘O ka Wehewehe MNP hoʻi kekahi haʻawina o ka papa i ka pōʻakolu. He loaʻa mai koe o ua moʻolelo nei, a hoʻolako ʻia ma ka ʻaoʻao kūpono o nei paena pūnaewele.

‘O ka hope loa nō, e hoʻoulu i manaʻo, i mau manaʻo paha no ke kumuhana o kāu papahana noiʻi nūpepa e hana ʻia i ka hopena o kēia kau. Kamaʻilio ʻia hoʻi i kēia papa e hiki mai ana. I mua a loaʻa ka lei o ka lanakila!

E kākau nō i kā piha o kāu moʻolelo KUH 2, a waiho ʻia i loko o ka faila Pukana 2, ma mua o ka papa i ka pōʻakahi. Eia hoʻi, e lawe mai nō i kāu puke kākau, i hōʻiliʻili ai au a heluhelu aku.

I kōkua no ka haku ʻana i nei moʻolelo nūpepa, ua waiho ʻia kekahi papa helu no nā loina kākau i hāpai ʻia i loko o ka papa. E nānā ka maka, a e komo paha nā mea kūpono i loko o kāu moʻolelo.

E wehewehe ʻia ana ka moʻolelo ʻo "Ka Ulana ʻAna" e Keanu; e heluhelu nō i ka moʻolelo ma mua o ka hele ʻana mai i ka papa. Aia nō ma ka ʻaoʻao Wehewehe MNP.

Eia hoʻi kākou ke eʻe mua nei i ke kākau moʻolelo ʻelua no Ka Ulu Hoi. A koho ʻia kāu wahi kumumanaʻo a pahuhopu hoʻi, e hoʻopaʻa i paukū hoʻokahi no ka wehewehe ʻana i ia moʻolelo holoʻokoʻa, a waiho ʻia ma kēia faila nei.

Na Kahā e wehewehe mai i keia moʻolelo nūpepa. Ma ka ʻaoʻao Wehewehe MNP e loaʻa ai. E heluhelu aku nō.

Eia hoʻi nā moʻolelo ʻē aʻe e heluhelu ai, no ka loli ʻana o ka ʻāina:

• Ikemaka, W.S.K. "One Kani Hou." Ka Hae Hawaii. 1 Iulai 1857, 4.

• "Mamina ke One Oiwi." Ka Lahui Hawaii. 14 Ianuali 1875, 2.

E hele mai nō me ka mākaukau no ka hāpai ʻana i nīnau paha, i nā loina kākau hoʻi i loaʻa mai ma ua mau moʻolelo nei.

E hoʻomākaukau no kā Kaiaka wehewehe ʻana i kāna moʻolelo nūpepa. Hiki ke loaʻa ma ka ʻaoʻao Wehewehe MNP o nei paena pūnaewele.

Eia hoʻi, inā ʻaʻole i pau ka haku hou ʻana a me ka hoʻoponopono ʻana i kāu moʻolelo mua no Ka Ulu Hoi, e hoʻopau koke! E alawiki mai nō!!